CEBU, Philippines — Dili uyon si Cebu City Mayor Michael Rama sa pag-usab sa Sinulog Grand Parade sa sunod tuig nga magsugod na sa hapon.
Ang mayor nibutyag nga iyang tan-awon ang maong proposal lakip ang pag konsiderar sa gidaghanon sa contingents.
Gipasabot sa Mayor, tan-awon usa niya tungod kay ang Sinulog magdepende kung pila kabuok ang contingent, ug concern usab siya sa oras sa matag contingent nga maka pasundayag kung ang grand parade magsugod na sa alas tres sa hapon inay sa naandan nga alas otso sa buntag.
Dugang pa ni mayor Rama, dili usab siya pabor sa tinguha nga ang Sinulog Grand Parade mahuman sa kadlawon, pero ang tanan nga mga suhesyon ilang hatagan og consideration.
Ang sugyot nga pag-usab sa oras sa pagsugod sa parade nagagikan kang Konsehal Phillip Zafra, tungod sa iyang kabalaka sa epekto sa init sa adlaw ngadto sa mga mananayaw og tumatan-aw ilabi na ang Sinulog ipahigayon gihapon sa South Road Properties.
Tinguha niini nga karon palang kinahanglan kini nga pangandaman aron mas mapasayon na unya sa mga manan-away lakip na usab sa mga dancers. (BANAT NEWS)