12 ka pamilya nga naa sa danger zone pabalhinon

CEBU, Philippines — Mokabat sa 12 ka pamilya nga naa nagpuyo sa baba sa estero de parian sa may Port Area sa Barangay Tinago ang pabalhinon sa dili pa matapos karong semanaha.

Ang Chairman sa Cebu City Task Force Gubat sa Baha Retired General Roy Cimatu, nihimo sa maong rekomendasyon atol sa ilang meeting uban ni Cebu City Mayor Michael Rama sa nilabay nga adlaw nga gitambongan usab nila ni City Administrator Atty. Collin Rosell, River troopers, ug TFGB river commander.

Si Cimatu, niawhag sa siyudad nga magpasiugda sa pagpabakwit aron malikayan ang  kagubot.

Dugang pa ni Cimatu, nga mas maayo nga dili na magpaabot og laing kalamidad una pabakwiton ang maong mga pamilya.

Ang rekomendasyon ni Cimatu, gihimo human siya ug iyang mga river commanders nihimo sa pagbisita sa maong dapit.

Ang 12 ka pamilya mahimong mabalhin sa bakante nga luna sa may barangay hall sa Tinago.

Human sa kamanduan ni Cimatu, dali nga nimando si Rosell ngadto sa mga opisyal sa DWUP, PROBE CDDRMO sa pagpabakwit sa maong 12 ka pamilya.

Dugang pa ni Rosell, kinahanglan hawanan ang maong dapit kay illegal kini nga estraktura ug anaa pa gayud sila sa danger zone.

Giawhag usab ni Rosel ang Cebu City Police Office sa pag-abag unya sa himoong pagpabakwit sa maong mga pamilya.

Gitan-aw usab ang Cebu City Quarantine Center sa North Reclamation Area nga posibleng himoon nga evacuation site. (BANAT NEWS)