Chinese national natagak gikan sa gitukod nga building

CEBU, Philippines — Patay ang usa ka Chinese national human kini natagak gikan sa ikaduhang andana sa gi-construct nga building niadtong Martes sa hapon diha sa Barangay South Poblacion, Lungsod sa San Fernando.

Ang biktima giila nga si Li Guanglun, 55-anyos, empleyado sa Taiheiyo Cement Philippines Inc. nga nahimutang diha sa nahisgutang barangay.

Matud ni Police Major Mark Anthony Villanueva, hepe sa San Fernando Police Station nga nakadawat sila og tawag gikan ni Gemma Accampa ado, head nurse sa South Medical General Hospital kabahin sa kamatayon sa Chinese national.

Ang San Fernando Police Station daling niresponde sa maong taho ug nipahigayon og imbestigasyon diha sa lugar nga nahitaboan.

Base sa imbestigasyon sa kapolisan nga tingpaniudto na niadtong higayona kinsa ang biktima ug ang kauban sa trabaho ang nahabilin sa ikaduhang andana sa nagpadayon nga gitukod nga edipisyo.

Samtang naglakaw ang biktima ug kauban niini natumban ni Li ang kahoy nga konektado sa pikas bahin sa building ug aksidenteng naputol hinungdan nga natagak kini sa ground floor ug napantok ang ulo sa semento nga sawog.

Ang biktima dali kining gitabang sa San Fernando Rescue Unit ug gidala diha sa South Medical General Hospital apan gideklara kini nga patay na pag-abot sa maong tambalanan ni Dr. Johanna Francis Dompor.

Ang kapolisan nagpadayon pa karon sa pagpahigayon og imbestigasyon kalabot sa maong insidente. —  Decemay P. Padilla (BANAT NEWS)