Kerwin gitugotang makapiyansa

CEBU, Philippines — Gitugotan sa lokal nga hukmanan sa Baybay, Leyte nga makabutang og piyansa ang self-confessed druglord nga si Rolan Kerwin Espinosa uban sa upat pa niya ka mga kauban may kalabotan sa kaso sa ilegal nga drugas nga gisang-at kanila.

Sa gipagawas nga kamandoan niadtong nakalabay nga adlaw nga Martes, si Judge Carlos Arguelles sa Regional Trial Court Branch 14 mitugot nga makabutang og piyansa nga P700 mil matag usa silang Espinosa, mga kaubang akusado nga silang Marcelo Adorco, Jose Antipuesto, Alfred Cres Batistis ug Brian Anthony Zaldivar.

Sa pagkakaron, si Espinosa naa gipriso sa Taguig samtang ang upat naa sa Ormoc City Jail.  Ang laing duha nga kauban nila sa maong kaso nakombikto na ug naa karon sa New Bilibid Prison, samtang duna pay laing duha nga gipangita.

Si Kerwin naaresto niadtong tuig 2016. Ang iyang abogado miduso kanidto og petisyon aron kini makapiyansa human ang prosekusyon nipresentar sa ilang ikatulong testigo.

“Sifting and scouring through the pieces of evidence submitted by the prosecution, this court found no corroboration. There were no eyewitnesses in the commission of the crime that could positively identify Espinosa and his co-accused of having committed the crime charged,” matud pa sa mando sa korte.

Matud pa sa hukom, ang mga testimonya sa mga testigos dili nila personal nga nakita kondili gibase ra nila gikan sa extrajudicial confession ni Espinosa atol sa Senate inquiry ug sa National Bureau of Investigation.

Agusto 2021 sa dihang gikasohan sa Department of Justice si Espinosa ug ang mga kaubang akusado tungod sa kalambigitan sa illegal drug trade sa Eastern Visayas.

Niadtong 2022, gibakwi ni Espinosa ang iyang mga pamahayag batok ni kanhi senatdor Leila de Lima, ug mipasangil nga siya gihulga sa mga polis aron iduot gyud si De Lima nga duna kini kalambigitan sa illegal drug trade.

Usa sa mga kaso ni Espinosa sa ilegal nga drugas ang gibasura sab sa korte niadtong Disyembre 2021.

Sayo sab ning buwana, gi-acquit si Espinosa ug Adorco sa usa ka hukmanan sa Makati City sa lain sab nilang kaso sa ilegal nga drugas tungod sa kapakyas sa prosekusyon pagpresentar og igong ebidensiya nga magtumbok nga sad-an ang duha.