Bag-ong coliseum tukoron diha sa Tagbilaran

CEBU, Philippines — Gibutyag ni Tagbilaran City Mayor Jane Yap ang plano nga pagpabarug unya ug bag-ong coliseum sa Tagbilaran City nga makasulod ug 10mil ka mga tawo.

Matud pa ni Yap, ang maong coliseum anha tukoron sa may Barangay Dampas.

Ang pagatukoron nga convention center mao kini unya ang pinakadako sa probinsya sa Bohol nga pagatawgon ug Tagbilaran City Coliseum.

Malaumon si Yap, duha ka tuig gikan karon magamit na nila ang maong coliseum tungod kay sunod tuig aduna na kini atop ug tauran usab kini nila ug aircon.

Plano nila nga dinhi ipahigayon ang mga dagkong kalihukan sa Tagbilaran ilabi na ang Saulog sa Tagbilaran Festival. Ang maong coliseum mokantidad ug 180milyones ka pesos ug aduna na kini igong pundo aron hingpit na kining masugdan og trabaho.

Gitug-an ni Yap ang maong pundo naggikan sa local ug national nga panudlanan sama ni Senator Mark Villar, kinsa nisaad ug 20milyones ka pesos alang sa maong proyekto.

Sa pagkakaron kasamtangan usa gipahigayon sa Carlos P. Garcia Sports Complex ang nilabay nga Saulog sa Tagbilaran Festival nga gipanag-iya sa Bohol Provincial Government, diin mapasalamaton si Yap ngadto kang Governor Erico Aristotle Aumentado sa mga suporta ug tabang nga gipaambit niini ngadto kanila. /MEL (BANAT NEWS)