4-anyos napaig sa apartment

CEBU, Philippines — Patay ang usa ka 4-anyos nga batang person with disability (PWD) human kini napaig human nasunog ang ilang balay sa Purok Tugas, Bag-ong Dalan, Liloan  alas-2:57 sa buntag niadtong adlaw nga Huwebes.

Ang nakalas usa ka 4-anyos ug napulo ka buwan nga batang lalaki ug giingong usa ka special child. Matud pa ni Police Staff Sergeant Neil Ryan Talle, Desk Officer sa Liloan Police Station, base sa ilang inisyal nga imbestigasyon giingong wala ang inahan sa bata nga si Edna Samson sa ilang giabangan nga balay tungod kay nitambong kini sa trabaho.

Sumala pa ni Talle walay nakasalbar sa bata tungod kay naka-lock ang balay ug dili kini maabli. Ang kapulisan padayon pa nga nihimo sa ilang imbestigasyon ug nisusi kung aduna bay tulobagon ang inahan sa bata.

Samtang si Senior Fire Officer 1 Jack Hansan, imbestigador sa Liloan Fire Station wala pa mohatag ug kinatibuk-an nga detalye sa maong sunog lakip usab ang pangalan sa balay kung diin niulbo ang maong sunog.

Apan sumala pa ni Hansan ang nasunog  usa ka 2-storey apartment building nga gibahin kaupat ug didto giingong nagsugod ang sunog sa giokupar sa manag-inahan.

Mokabat  P480 mil ang danyos sa maong sunog ug giisa lang ngadto sa 1st alarm.

Samtang usa ka 33-anyos nga construction workers ang gitangong sa kapolisan tungod matud pa gisuwayan niini pagsunog ang ilang balay diha sa Sitio Cabangcalan 2, Barangay Bulacao ning dakbayan sa Sugbo. Ang nasikop naila nga Ryan Gardaban.

Matud pa ni Fire Officer 3 Fulbert Navarro, Fire Investigator sa Cebu City Fire Office kasohan nila si Gardaban og destructive arson tungod dili lang diay kini karon pa gihimo sa suspek. Karong tuiga ikatulo na kini ka higayon niya buhata.

Gitug-n pa ni Navarro, kung nadayon pa ang sunog  maglisod ang kabomberohan pagsulod sa lugar tungod kay hagip-ot kaayo ang dalan.

Mapasalamaton sila sa mga residente sa lugar nga dali nga nagtinabangay aron dili ka dako ang kalayo. Dugang pa ni Navarro, kasamtangan usa nilang ipakustodiya sa kapulisan ang dinakpan samtang andamon ang kaso.

Nakita nila ni Navarro, sa fire scene mao ang nasunog nga senina, bed sheet, usa ka bahin sa balay nga nidukot na unta ang kayo. Ang maong dinakpan giingong nalambigit sa paggamit ug illegal nga drugas.

Ang igsuon sa dinakpan maoy nangusog nga ipapriso ang maguwang kay katulo na kini ka higayon gibuhat sa suspek ug nabalaka siya nga siya maoy kontrahan sa mga silingan. —IBM (BANATNEWS)