Resort sa Lapu-Lapu giimbestigar sa kalapasan sa health protocol

CEBU, Philippines — Gipaabot pa ni  Lapu-Lapu City Mayor Junard Ahong Chan ang resulta sa imbestigasyon sa kapolisan  ug sa buhatan sa City Tourism Cultural and Historical Affairs Commission (TCHAC) kalabot sa giingong pagpasiugda sa usa ka resort ug kalihukan nga nakalapas sa safety ug health protocols.

Gikonsiderar ni Mayor Chan ang pagluwat unya og show-cause order batok sa tagduma sa resort o mag-agad lamang unya sa resulta sa imbestigasyon.

Ang mayor nakadawat og mga hulagway ingon man video sa maong kalihukan nga matud pa gipasiugdahan sa usa ka networking company.

Base sa nakita sa mga hulagway ug vidoes nagdasok ang mga tawo sa gihimong kalihukan sa resort nga nakalapas sa health protocols.

Naglakip sa kalapasan mao ang wala pagsul-ob og face mask, wa pagsunod sa social distancing ug uban pa.

“We will check it first, we’ll conduct an investigation. We cannot issue right away if there is no due process,” ni Mayor Chan pa. Hugot usab nga gihimakak ni Mayor Chan ang tahu nga didto siya sa maong event. MEL (BANATNEWS)