Bucao biktima sa black propaganda?

CEBU, Philippines — Giangkon ni Bise Mayor Alan Bucao sa Siyudad sa Talisay nga wala siya’y kalabotan sa nanggawas nga estorya diha sa social media nga modagan siya pagkamayor sa siyudad.

Iyahang gipasabot nga ang Facebook page nga “RUN ALAN RUN” usa ka black propaganda nga gitumong diha kaniya.

Niining ulahi lang, nigawas ang mga estorya nga giingong modagan si Bucao pagkamayor batok sa asawa ni Mayor Gerald Anthony “Samsam” Gullas Jr. nga si Rhea.

Gani sa bag-ong nigawas nga propaganda si kanhi bise mayor Aberdovey Belleza maoy iyang bise mayor sa sunod tuig nga piniliay.

Si Gullas sa iyahang bahin,  nituo kini kang Bucao ug natahap nga posibleng adunay mga supporter ang nagtukmod kang Bucao nga modagan pagkamayor sa siyudad.

“I believe Alan. Maybe naa lang gyud siya’y supporter nga nag-push niya modagan pagkamayor. That’s normal. Everyone has supporters who wish better sa ilang gisuportahan.  I believe VM Alan”, matud ni Gullas.

Matud ni Bucao nga makatutok siya sa mga mata sa mayor tungod kay dili siya guilty ug nisalig usab siya sa iyang mga staff nga wala maghimo sa black propaganda.

“Siguro mo like sila kay gisakitan na sad sila sa akong kahimtang ug gipinahan nako silang tanan nakong staff. However, sakit nga ang wala manghilabot maoy perming pasangilan”, ni Bucao pa.

Sa pangutana kung kinsa ang nagbuhat sa black propaganda si Bucao niingon nga dili siya gusto mopasangil kay makasala ra unya siya.

“Dili ko gusto mopasangil Sir kay makasala ta. Dugay na nga ako maoy perming pasanginlan. My conscience is clean and my heart as well”,  dugang ni Bucao. —BDB (BANATNEWS)