Dugang mga nitso tinguhang tukoron sa sam-ang sa Bo. Luz

CEBU, Philippines — Gisusi ni Cebu City Councilor Jerry Guardo, Chairman sa Committee on Infrastructure ang sitwasyon sa sam-ang diha sa Sitio Cabantan, Barangay Luz, ning siyudad nga maoy usa sa tukuran unya og mga nitso. Sa pagsusi ni Konsehal Guardo sa maong sam-ang nakita niini ang usa ka block nga gisugdan na og tukod sa tigdumala sa maong sam-ang ug maoy gitanyag matud pa sa siyudad kun asa sila pwede makasal-ot alang sa pagpadayon sa konstraksyon sa mga nitso.

Nasayran ang maong sam-ang ubos kini sa pagdumala sa St. Joseph de Patriarch Parish diha sa Barangay Mabolo.

“We’re just awaiting for the signed MOA ni Archbishop Palma kay para ma include namo in our next regular session para paghatag og authority, mao man na atong procedure diha before our Mayor mo sign sa MOA so naay favorable opinion from the City Legal kay we are using government funds to private entity so there must be a proper order, document, supporting papers, ang MOA”, dugang sa konsehal.

Ang siyudad nagplanong motukod og mga nitso sa upat ka mga sam-ang sa siyudad nga naglangkob sa Calamba, Carreta, Bo. Luz ug Talamban isip tubag sa nagkuwang nga lubnganan karon tungod sa pagsaka sa gidaghanon sa  mga nangamatay sa COVID ingon man sa ubang mga sakit.

Una ng nabalita nga ang mga tagdumala sa sam-ang diha sa Calamba ug Bo. Luz miuyon na sa hangyo sa siyudad. —IBM (BANATNEWS)