Underpass sa N. Bacalso nasanapan sa baha
CEBU, Philippines — Nasanapan sa baha atol sa pagbunok sa kusog nga uwan kagahapon sa buntag ang underpass diha sa Natalio Bacalso Avenue, Dakbayan sa Sugbo.
Ang maong lugar temporaryong gisiradohan aron walay moagi nga sakyanan unya mapalyar apan nakamugna kini og kahuot sa dagan sa trapiko. Si Victor Caindec, regional director sa Land Transportation Office (LTO)-7 ni-post sa maong insidente diha sa iyahang facebook page.
“Congratulations to the Mambaling Canal! Wala na gyud intawon gibaha sa taas, ninaog na gyud ang tubig sa ubos. It is now finally living up to its reputation as an Ph800M canal”, matud ni Caindec sa iyang post.
Subay niini, si Konsehal Eduardo Rama Jr. ni-post usab sa maong hitabo diin matud niya nga padulong siya sa city hall kagahapon sa buntag apan nahibong siya nga traffic na kaayo ug gisirad-an usab ang tunnel.
Si Rama nagkanayon nga pila na kahigayon nga gipatawag niya sa konseho sa siyudad ang Department of Public Works and Highways (DPWH) apan hangtud karon giingong wala gihapon masulbad ang maong problema.
“Duol P1 billion ang gigasto niini ug usa kini ka pet project sa atong Congressman diri sa South District na kuno makasulbad sa baha. Palihog sulbara intawon ninyo”, tipik sa post ni Rama.
Base sa report ni Engineer Nonito Paylado sa DPWH maintenance division nga functional ang upat ka pumps sa underpass apan gumikan sa pagbunok og kalit sa kusog nga uwan wala nakaya sa upat ka pumps ang grabeng tubig. Gumikan sa pagsaka sa tubig gipasirado sa DPWH ang underpass aron walay malumos nga sakyanan ug paglabay sa pila ka oras nihubas na ang baha ug gipaagian og balik sa mga sakyanan ang underpass. —BDB (BANATNEWS)
- Latest
