Guardo moumol sa River Diggers team

Cebu, Philippines — Si Konsehal Jerry Guardo, chairman sa committee on infrastructure nagplano sa pag-umol og team nga tawgon og “River Diggers” diin sila ang mokawot sa sapa diha sa mga sudlonon nga bahin.

Gipasabot ni Guardo nga gitawag niya kini og “River Diggers” tungod kay adunay mga request sa mga barangay kapitan sa Siyudad sa Sugbo nga gustong magkawot sa ilang sapa ug tungod kay ang mga sapa naa sa sudlonon nga bahin maglisod ang ilang mga ekipo sa pagsulod ug dili nila malimpiyohan.

“Habwaon to nila, regular sad to sila nga team, ang ilang trabaho ang Menus Baha primarily ang ilang focus sa mga kanal man, declogging sa mga kanal, ang mga River Diggers primarily ang ilang function ang kadto gyud mga sapa sab”, pasabot ni Guardo.

Matud ni Guardo usa usab sa hinungdan nga makamugna og baha ang mga sapa nga puno na sa yuta ug basura ug di na kadagayday og tarong ang tubig.

“On top of Menus Baha Task Force we are putting two teams for the river diggers, so mao na primarily ilang function. There should be request sa mga barangay nga magpa-dredge sa ilang sapa we can deploy immediately”, dugang ni Guardo.

Nasayran nga si Guardo usab ang niumol sa Menus Baha Task Force nga ang trabaho mao ang pagkawot sa mga drainage sa siyudad aron makatabang nga mamenosan ang baha sa dakbayan ilabi na kon mobunok ang kusog nga uwan. ( BANAT NEWS)