Pagbalhin sa mga buhatan sa Kapitolyo gikalipay

Cebu, Philippines — Gikalipay sa mayor sa lungsod sa Balamban ang plano sa Probinsya sa Sugbo nga motukod og Cebu Provincial Government Center didto sa ilang lungsod.

Si Mayor Alex Binghay miisip nga dako kining hagit alang kanila apan andam sila mosanong hilabina nga magdala kini og dugang nga kalamboan sa ilang lungsod.

Butyag ni Binghay nga sa wala pa gianunsyo sa gobernador ngadto publiko ang maong plano, napahibalo na siyang daan bahin sa plano niini ug gani plano nila mo-hire og urban planner alang niini.

"Mas maayo nga naay urban planner (so that) we will know the cost, how it will look inig kahuman so anyway we take up the challenge not because we are not ready but nindot ning naay challenge kay if muingon ta nga di ko ready, we will lose the opportunity," matud ni Binghay.

Ang Kapitolyo ni-target og P550 million alang sa maong proyekto. Adto ipahiluna ang nagkadaiyang buhatan sa executive ug legislative department sa Kapitolyo.

Wala pa gitug-an ni Gobernador Gwendolyn Garcia kun asa dapit sa lungsod tukoron ang maomg edipisyo apan matud ni Binghay nga adunay tulo ka dapit nga ilang girekomendar ngadto sa Probinsya.

Ang Balamban usa sa mga malamboon nga lungsod nahimutang sa kasadpang bahin sa Sugbo ug maoy sentro nga local government units gikan sa amihanan ug habagatang bahin nga mga lungsod ug dakbayan sa Probinsya sa Sugbo.

Anha sab nahimutang ang mga dagkong shipbuilding yards nga nakahatag og trabaho sa liboang mga Sugboanon ug mga taga laing probinsya. Anha sab nakakonektar ang Transcentral Highway padung sa Cebu City. Si Binghay nagkanayon dili kini ang unang higayon nga nidawat sila og hagit pag-abot sa pagtukod og estraktura ug uban pang plano o development nga niabot sa lungsod.

Dugang niya kung dili morisgo, wala usab mahimong kalamboan "The Municiplaity cannot take progress if you will not take the risk," matud ni Binghay.  (BANAT NEWS)