Baha sa Mandaue, Talisay

CEBU, Philippines — Gipaalerto ang mga personnel sa Disaster Risk Reduction and Management (DRRMO) sa Dakbayan sa Mandaue  ug Talisay nunot sa pagbunok sa ulan.

Sa miaging Martes sa gabii pipila ka mga dalan ang gibahaan maong dunay mga sakyanan nga napagngan sa Mandaue City. Ang dalan A.S Fortuna sa  Banilad,  Lopez Jaena sa Subangdaku ug uban pa nakasinati og baha maong dili maagian sa mga sakyanan anang adlawa.

 Ang DRRMO sa dakbayan nga gipangulohan ni Felix Suico Jr. miingon nga ila sab gitutokan ang bukirang barangay nga dunay peligro sa pagdahili sa yuta. Sa laing bahin, ang kapulisan sa Dakbayan sa Talisay mialerto sa mga sakop niini tungod niini bati nga dagan sa panahon nga nasinati sugod niadtong Martes sa hapon hangtud kagahapong adlawa.

Si Police Major Gerard Ace Pelare, pangu sa Talisay City Police Station mimando sa mga sakop niini sa pagtuyok sa mga sakop sa Search and Rescue (SAR) sa mga barangay.

Pagrekorida kini aron pasidan-an ang mga mulopyo sa kabukiran ug kabaybayonan nga dili mokumpyansa. –Gabriel Bonjoc/IBM (BANATNEWS)