Isolation facilities sa Mandaue gipaspasan

CEBU, Philippines — Gitinguha sa kagamhanan sa Dakbayan sa Mandaue ang pagbalik na sa mga publikong tunghaan nga gigamit isip isolation facility sa mga pasyente sa coronavirus disease 2019.

Kini sa higayon nga mahuman na ang kaugmaran sa gitukod nga duha ka bag-ong isolation facilitis sa dalan Plaridel sa Barangay Looc ug Cebu North Bus Terminal sa Barangay Subangdaku.

Si Engineer Marivic Cabigas, pangulo sa Department of General Services (DGS), niingon nga paspas ang pagtrabaho sa Norkis Park sa Barangay Looc kauban sa 11 ka kawani gikan sa City Engineering Office.

Matud ni Cabigas nga ilang gisugdan ang pagpahigayon sa clearing operation sa maong pribadong building human usab sa pagsusi personal ni Mayor Jonas Cortes.

Gitataw ni Cabigas nga ubos sa plano ilang himoon ang 64 ka lawak alang sa pasyente sa COVID-19 ug dunay mga kapuy-an sa mga doktor ug nurses.

Dugang pa niya nga bisan dili air-conditioned ang matag lawak apan giseguro nila ang kabugnaw niini tungod maayong ventilation.

Gipaneguro usab ni Cabigas nga walay lamok sa maong mga lawak tungod kay kanunya kini nilang pasiritan og insecticide isip panagang sa mga pasyente sa COVID-19 nga dili mapaakan og lamok. /GMR (BANATNEWS)