North Bus Terminal gitrabaho na aron himoong isolation facility

CEBU, Philippines — Gisugdan na pagtrabaho ang pagahimoon nga isolation facility sa kagamhanan sa Dakbayan sa Mandaue nga mao ang Cebu North Bus Terminal CBNT.

Ang luna nga nahimutang sa Barangay Subangdaku  gipanag-iya sa kagamhanan sa Dakbayan sa Mandaue   apan giabangan kini sa kagamhanan sa Dakbayan sa Sugbo nga gibutangan  sa North Bus Terminal  nga gipadagan usab pinaagi sa kooperatiba.

Ang kontrata sa pag-abang sa Dakbayan sa Sugbo sa maong terminal matapos karong buwan  sa Oktobre ning tuiga.

Ang Department of Public Works and Highways (DPWH) 7  maoy nagtrabaho  sa maong pasilidad diin una nilang gihimo ang mga comfort room sa mga daplin niini.

Si Atty. John  Eddu  Ibañez nga maoy executive secretary ni Mayor Jonas Cortes miingon nga ang gitukod nga isolation facility sa dakbayan mao unya ang butangan sa mga pasyente nga dunay  mild ug moderate nga kaso coronavirus disease COVID-19

Nagkanayon si Ibañez nga gihimo sa syudad ang maong pasilidad aron hinay hinay na usab nila nga mabalhin ang mga pasyente gikan sa mga isolation facility tungod kay gamiton na sa Department of Education DepEd ang mga  tunghaan alang sa pagbukas sa klase.

Sa nasayran atol sa virtual meeting tali sa mga sakop sa school board nasabutan nga kutob na lang karong Hulyo 30, 2020 ang paggamit sa mga publikong tunghaan isip mga isolation facility.  /MEL (BANATNEWS)