Mga pinabuthan o gihiloan nga isda dili ipadawat

CEBU, Philippines – Ang Bureau of Fisheries and Aquatic Resources (BFAR)-7 niawhag sa mga fish trader nga dili mamalit og mga isda nga gigamitan og mga ilegal nga pamaagi ang pagkuha niini.

Ang direktor sa BFAR-7 Allan Poquita nagkanayon nga ilang gidasig ang mga fish trader nga dili mopalit o modawat og mga isda nga pinabuthan ug gigamitan og hilo tungod kay makadaot kini sa panglawas sa mga konsumidor ug dali usab madaot o madubok ang   mga isda nga pinabuthan o gihiloan.

Gibutyag ni Poquita nga gihingusgan nila ang pagsusi sa mga local transport tungod kay aduna na silay mga nasakpan ilabi na kadtong gikan sa Zamboanga nga adunay ipalusot nga pinabuthan nga ipahimutang sa pinakailalom nga mga banyera.

Ug pinaagi sa local transport permit ang authenticity sa mga karga nga isda mahibaw-an ug mapugngan usab ang mga ilegal nga kalihukan nga pagkarga sa mga isda nga gigamitan og hilo o pinabuthan.

Dugang ni Poquita nga dako og tabang ang mga fish trader nga dili makalusot ang mga isda nga pinabuthan o gihilioan dinhi sa Central Visayas kong dili sila modawat niini. /BDB (BANAT NEWS)