Walo ka oras nga duty sa polis gimando
CEBU, Philippines – Sa tinguha nga makapahuway og tarong ang mga polis, ang Police Regional Office 7 mopatuman sa walo ka oras nga trabaho sa mga sakop niini.
Matud ni PRO7 Regional Director Police Brigadier General Albert Ferro kinahanglan kini aron makapahuway og taas nga oras ang mga polis kay dili na sila epektibo kun molapas og 12 ka oras nga nag duty. Sa pagkakaron, tag 12 ka oras ang trabaho sa mga polis.
Gibutyag ni Ferro nga bisan pa man maapektohan ang police visibility sa kapolisan apan mas maayo kini kay lagsik nga makaresponde ang mga polis.
Apan iyang giklaro nga bisan off-duty kun dunay alarma kinahanglan silang moresponde.
Sa pikas bahin, ibalik na sa Cebu City Police Office (CCPO) ang gi-disband nga Theft and Robbery Section sa Dakbayan sa Sugbo.
Kini maoy gibutyag ni CCPO Director Police Colonel Engelbert Soriano human niya nakita basi sa crime index, ikatulo sa listahan ang kaso sa pagpangawat ug pagpanulis sa siyudad.
Gipatawag og balik ni Soriano ang 11 ka mga polis nga kanhi sakop sa TRS aron silay motutok sa mga kaso sa pangpangawat ug pagpanulis.
“Kasi kung titingnan mo statistics ng Cebu City ever since ang top 3 ay physical injury, theft and robbery. Tapos walang dedicated team to really to counter it or mag imbestiga or sa crime prevention,” matud pa ni Soriano.
Gibungkag ang TRS ni kanhi CCPO City Director Police Colonel Royina Garma niadtong 2017 ug gipamutang sa 11 ka police station ang mga sakop niini.
Gawas sa TRS, gibalik na sab ang special unit nga Homicide Section nga maoy motutok sa mga kaso sa pagpatay.
Ang TRS ug Homicide dumalahon ubos sa City Investigation and Detection Management Branch (IDMB) sa CCPO. /IBM (BANAT NEWS)
- Latest
