Baron wa mangulata
CEBU, Philippines — Walay nahitabong pagpangulata sud sa usa ka pribadong tambalanan sa Capitol Site nga nalambigit ang aktor nga si Baron Geisler.
Sa usa ka suwat nga nadawat sa Banat News gihimakak nga dunay komosyong nahitabo tali sa aktor ug sa mga gwardiya didto.
Ang giingong komosyon gikan sa tinubdan sa Banat News giingong nahitabo niadtong Enero 22,2020. Apan gihimakak kini.
“That there was no such incident happened between Baron Geisler and hospital guards as reported,” matud pa sa maong suwat bahin sa nigawas nga balita sa Banat News kagahapong adlawa Enero 23,2020.
Ang Banat News misuway sa pakuha og habig sa tambalanan ug sa kampo sa actor nianang adlawa apan wala tugoti sa mga gwardiya ang mga tigbalita nga makasulod sa establisamento.
Ang abogado ni Geisler nga si Atty. Genevieve Paulino sa pakighinabi sa Banat News kagahapon nagdumili gihapon paghatag og opisyal nga pamahayag bahin sa nahitabo.
Apan kini miingon nga si Baron nga usa na karon ka Born Again Christian naningkamot nga magpuyong malinawon uban sa iyang pamilya.
“Si Baron as a Born Again Christian naningkamot nga magtarong na ug nagpuyong malinawon kauban sa iyang pamilya,” matud pang Paulino. /IBM (BANATNEWS)
- Latest
