2020 tuig sa Metal Rat

CEBU, Philippines — Ang tuig 2020 sa Chinese zodiac calendar mao ang Metal Rat. Sumala pa nga ang Metal Rat mao sab ang nag-una sa listahan sa tanang zodiac animals.

Kun nganong nag-una sa tanan ang ilaga? Ingon niini ang estorya, ang Jade Emperor mipahibalo nga maghimo kini og listahan sa mga tuig ug kini ipahinungod sa matag mananap.

Apan aron mahimo niya kini, iyahang giimbitar ang mga mananap kay kun kinsa ang unang makaabot sa iyang nahimutangan ug sa mga mosunod pang mangabot maoy iyang basehan sa paglista.

Kay nasayod man ang ilaga nga lupigon siya sa lumba sa dagan padung sa emperador, iyang gihangyo ang Ox (kaliwat sa baka) nga pasakyon siya sa buko-buko niini. Wala ra sab mobalibad si Ox kay lagi wa may mawala kaniya kay nag-una naman siya.

Apan sa pagabot gyud nila sa tungod sa emperador, kalit lang nga milayat sa unahan ang ilaga, mao nga siya maoy nakauna sa tanan.

Sumala pa sa Chinesenewyear.net, ang ilaga ikauban sab sa Earthly Branch  Zi  ug maayo panahon sa tungang gabii.

Sa yin ug yang  (yin yáng), ang ilaga nasakop sa yang ug nagrepresentar kini sa bag-ong ugma.

Sa kultura sa mga Intsik, ang ilaga senyales sa kaabunda ug awas o sobra-sobra. Ang ubang mga magtiayon nga wala pa magasahi og anak mag-ampo sa mga ilaga tungod kay ang ilaga paspas kaayong  mosanay.

Kun panid-an og maayo ang kinaiya sa mga ilaga, kung dili lang isipon kun diin sila sagad makita, usa sila sa labing malampuson nga mananap sa kalibotan.

Maayo silang mosulbad sa ilang problema aron makakaon, paspas silang makakita og ideya, malampuson apan makahibalong makontento sa kung unsay naa nila ug magpuyo sa hilom ug malinawong kinabuhi diha sa mga suok-suok.

Sa Chinese zodiac calendar, ang tuig 2020 gitawag nga Metal Rat tungod kay natunong kini sa zodiac animal nga Rat, ang earthly branch niini Zi, ang celestial stem niini geng ug ang elemento metal.

Ang mga tuig nga ubos sa Metal Rat mao ang 1924, 1936, 1948, 1960, 1972, 1984, 1996, 2008, 2020.

Ang mga tawong gipanganak sa tuig sa Metal Rat gihulagway nga nga positibo manghunahuna ug abtik sa bulohaton ug dali silang ikauban ni bisan kinsa.

Sensitibo sila sa emosyon sa uban apan dili daling patuohon. Manggihatagon sila apan tungod kay dili kaayong tigtingog usahay masaypan silang maldito.

Sa panalapi, ganahan kaayo sila magtigom apan kuripot. Apan tungod kay hilig nilang magsige og hipos-hipos usahay makagastos sila bisan di kinahanglan.

Kasaligan ang mga tawong gipanganak sa tuig sa ilaga ug lig-on kini sa pagpuyo. Ang uban maayong hatagan og gahom tungod kay makamao silang maniobrahon ang bati nga sitwasyon pabor sa iyang posisyon.

Maayong pareson ang ilaga sa Ox, Dragon ug Unggoy. Dili kaayo sila magkasinabot sa mga natawo tuig sa Kabayo, Kanding ug Kuneho (rabbit).

Ang maayong propesyon para sa mga natawo niining tuiga, editor, authors, writers tungod kay di mahubsan ang independente niining imahinasyon.

Lakip sa maayong propesyon para kanila ang architecture ug engineering tungod sa kahilig sa ilaga sa mga ginagmay nga detalye.

Apan dili unta kalimtan nga bisan unsa pang tuiga gipanganak, ang importante sa tawo mao ang makamaong manikay-sikay ug dili palas-anon sa uban. (BANATNEWS)