Palihi sa lingin nga prutas nagpabilin

CEBU, Philippines — Bisan niining modernong panahon nagpabilin pa gihapon ang palihi sa 12 ka lingin nga matang sa prutas sa pagsugat sa tungang gabii sa Bag-ong Tuig. Gumikan niining maong tradisyon niresulta sa pagmahal sa presyo sa mga prutas diha sa kamerkaduhan itandi sa mga ordinaryong adlaw.

Si Francisca Ruiz, 57-anyos nga taga Barangay Pagsabungan, Dakbayan sa Mandaue, wala igsapayan ang grabeng panaghuot sa mga sakyanan sa dalan aron makaadto sa Carbon Public Market sa Dakbayan sa Sugbo aron pagpamalit og lingin nga mga prutas.

Matud niya nga sa ordinaryo nga mga adlaw daku gyud ang kalainan sa presyo sa mga prutas sama sa mansanas nga sa ordinaryong adlaw tag P10 ang usa apan nisaka na sa tag P25.

Ang tambis nga sa odinaryo nga mga adlaw gibaligya lang og P2 ang buok karon tulo kabuok P10 na, chicos nga tag P5 ang buok, water melon P35 ang matag kilo, grapes tag P230 ang matag kilo, manga P130 ang matag kilo ug bayabas P60 ang kilo niini.

Si Ruiz niingon nga nagpabilin ang iyang pagtuo sa pagpalihi sa Bag-ong Tuig pinaagi sa lingin nga mga prutas kay maayo man usab ang dagan sa ilang panginabuhi apan iyang giklaro nga gawas sa pagpalihi nga iyang gihimo iyang giubanan usab sa iyang hugot nga pag-ampo ngadto sa Ginoo. /GMR (BANATNEWS)