Dalaga natagak gikan 24th floor

CEBU, Philippines — Patay ang usa ka 24-anyos babaye nga giingong natagak gikan sa 24th  floor sa usa ka condo unit niadtong Sabado sa kaadlawon nga nahimutang sa IT Park sa Barangay Apas, Dakbayan sa Sugbo.

Giila ang biktima nga si Marlhan Castaños nagpuyo sa maong dapit uban ang uyab niini nga usa ka Taiwanese national.

Matud ni Police Master Sergeant Antonio Din sa Mabolo Police Station sa ilang pakisusi sa nahitabo adunay saksi gikan sa pikas nga building nga nakit-an si Castaños ug uyab niini nga si Tsu-Ping Lin nga naglalis.

Si Tsu taga Taipei, Taiwan.

Gibutyag sa saksi nga una niining nakit an ang duha nga nag away, pipila ka minuto migawas sa lawak ang lalaki nga daw dunay gipangita.

Matud pa ni Din, ang saksi nakakita sa babaye nga naglingkod sa bintana nga walay sapot ug pagkahuman mipatong kini sa sementadong atop sa aircon unit ug didto milingkod ug mi “ba- bye” pa kini kanila.

Mibalik usab sa pagsulod sa kwarto ang langyaw nga daw sa nangita sa babaye apan sa dihang wala niya kini makita migawas na usab kini.

Sa dihang mokanaog na si Marlhan aron mobalik sa kwarto naligas ang iyang tiil ug na nilahos kinig kahulog sa ubos sa building nga maoy hinungdan nga nagdalig kanaog ang mga construction worker aron susihon ang nahitabo.

Patay na nga naabtan sa mga construction worker ang biktma sa ubos nga bahin sa building nga nangabali na ang kabukogan.

Sumala pa nga makadaghang higayon nga nakita ang langyaw nga nagsulod-gawas sa lawak.

Ang maong langyaw gikostudiya sa kapolisan alang sa imbestigasyon kalabot sa kamatayon sa uyab niini.

Matud pa ni Din, miangkon ang langyaw nga parehong silang nakainom sa iyang hinigugma.

Gibutyag usab sa  langyaw nga gikan pa sila sa usa ka Christmas party ug tungang gabii na nakabalik sa condominium diin siya kasamtangan nga nagpuyo.

Nangitag kuha sa CCTV ang mga imbestigador sa Mabolo apan walay naka kuhag video sa maong hitabo.

Tungod niini ipaubos nila sa autopsy ang patayng lawas sa babaye aron pagtino kun nakainom ba gyud      kini.

Lakip usab sa ilang buhaton mao ang pagpaubos sa drug test sa namatay kung wala ba kini makainom og illegal nga drugas tungod kay nagduda sila sa lihok niini nganong naghubo sa tanang sapot ug migawas pa kini sa bintana. /IBM (BANATNEWS)