Mga dalan paingon sa Hoopsdome siraduhon sa CTMS

CEBU, Philippines — Higpit nga ipatuman sa kapolisan ang seguridad atol sa mga kalihukan sa 500-days countdown sa quincentennial celebration karong Disyembre 14, 2019 nga ipahigayon diha sa Hoopsdome sa Barangay Gun-ob, Dakbayan sa Lapu-Lapu.

Nunot niini, siradohon sa City Traffic Management System (CTMS) ang pipila ka mga dalan sa maong lugar.

Si Presidente Rodrigo Duterte gilauman nga makatambong ug magsilbing guest of honor sa maong kasaulogan.

Sa nasayran  kang Lapu-Lapu  City Tourism Officer Ed Mendez  nga gilauman  nga mamulong si Duterte sulod sa 15 minutos sa maong adlaw sa kick-off  alang  sa countdown nga pagahimuon apan posible nga adunay mga kausaban  kon ugaling dili kini makahigayon sa pagtambong.

Gibutyag ni Mendez nga nipadala sila og imbetasyon kang Duterte ug kang Secretary Bernadette Romulo-Puyat sa Department of Tourism.

Matud ni Mendez nga kong dili makatambong si Duterte si Puyat maoy mohatag og mensahe.

Gibutyag usab ni Mendez nga ang National Quincentennial Committee (NQC) maoy  gitahasan  sa pagpadala og invitation alang sa presidente  sa nasud ug sa mga sakop sa gabinete.

Ang DOT maoy gitahasan sa pagpadala og mga invitation alang ngadto sa mga private sector, religious groups ug academe.

Ang mga nagkadaiyang kulturanhong pasundayag maoy makita sa maong adlaw  nga naglakip sa Mangayaw, Bangka, Sandugo,Taboan ug uban pa. - /BDB BANAT NEWS