Kinan-an palimpyohan sa customer

CEBU, Philippines — Gisugyot ni Bokal Kerrie Keane Shimura ang balaudnon nga kinahanglang limpyohan sa kustomer ang kinan-an sa mga kan-anan sa tibuok Lalawigan sa Sugbo.

Si Shimura adunay ordinansahon nga gitawag og Clean As You Go (CLAYGO) policy diin gimanduan ang mga kan-anan ug mga tindahan og mga pagkaon nga palimpyohan sa kustomer ang ilang kinan-an.

Ang ordinansahon anaa na karon sa committee on commerce and industry sa hunta probinsiyal nga gipangulohan ni Bokal Glenn Anthony Soco.

“Amo pa gihan-ay kay naa pa mi gipang-usab after sa public consultation,” matud ni Shimura, ang chairman sa committee on public health.

Gipasabot sa maong ordinansahon nga ang paghipos sa kinan-an ug mga sobra o basura responsibilidad sa mga kustomer aron maangkon ang kalimpyo sa lugar.

“Concomitant to the right to a balance and healthful ecology, the protection and preservation of our environment is not only a sole obligation of the concerned government agencies but also of the general public,” matud ni Shimura. (BANATNEWS)