Christmas lights gisusi sa DTI

CEBU, Philippines — Menus ang namaligya og uncertified Christmas lights sa mga tindahan sa Dakbayan sa Sugbo, Mandaue ug Danao base sa pakisusi sa Department of Trade and Industry.

Sigun ni Ines Cajegas, hepe sa Consumer Protection Division sa DTI-7, nga nakasakmit sila og 16 ka dagkung kahon sa Christmas lights gikan sa duha ka establisemento sa Dakbayan sa Mandaue.

Hinoon kadaghanan sa mga tindahan nituman sa mga rekisitos sa product standard law diin sagad sa mga Christmas lights dunay PS marks o kaha ICC marks.

Pasabot niini nga ang produkto pasado sa Bureau of Philippine Standard.

Kadtong mga nasakmit nga mga Christmas lights human unya sa due process ug hearing ug naa nay desisyon, kini gub-on o kaha dugmokon sa presensiya sa namaligya ug sa hingtungdang ahensiya sa gobiyerno.

Samtang ang tindahan diin nasakmit ang maong mga baligya ipaubos sa adjudication nga pasabot niini pahibaw-on sila ug hatagan og higayon nga makapasabot sa ilang habig ug pagpresentar og kamatuoran ug human sa due hearing ang posibleng mahitabo mao ang multa nga P25,000 sa unang kalapasan, P50,000 sa ikaduha ug P150,000 sa ikatulo samtang pwede sab makanselar ang ilang business name registration o kaha morekomendar ang ahensiya sa kanselasyon sa business permit.

Nanghinaut ang DTI nga magkagamay ang pagpalusot og Christmas lights nga wala gi-certify sa BPS pinaagi sab sa tabang sa mamalitay ug kaandam sa mga establisemento nga motuman sa balaud. (/GMR)(BANATNEWS)