Mayor Gullas gustong palihukon ang barangay

CEBU, Philippines — Nipasalig si Mayor Gerald Anthony “Samsam” Gullas Jr. sa Syudad sa Talisay nga tagaan niya og pundo ang matag barangay sa sunod tuig aron ilang magamit sa mga proyekto nga ilang prayoridad nga himuon sa ilang mga lugar.

Si Kapitan Edward Alesna sa Barangay Poblacion nibutyag nga sa ilang panagtigom uban ni Gullas kini maoy prayoridad nga buhaton sa mayor alang sa mga barangay.

Si Alesna nagkanayon nga sa iyang barangay, buot niyang pangusgan ang edukasyon para sa iyang mga konstituwente kabahin sa mga kaayohan kun ipatuman ang “purok system” sa ilang barangay.

Subling gipasabot ni Alesna nga ang purok system mao ang organisasyon sa managsilingan kun diin sila ang maghuna-huna kun unsa ang kaayohan nga ilang mahatud sa ilang palibot ug sa ilang kaugalingon lakip na ilang pamilya.

Si Alesna nitataw nga ang barangay andam mosuporta sa kalihukan sa tanang na organisasyon sa katawhan.

Gani usa sa ilang mahatag mao ang livelihood program nga tinguha sa mga membro sa purok.

Wa sab makatago sa ilang kalipay ang mga opisyales human sa hugot nga suporta sa batan-ong mayor. Wa man hinuon nibutyag si Alesna kun pila ang kantidad nga ihatag sa mayor kanila apan siya nagtuo nga sarang lang kini sa ilang mga prayoridad. Usa sa iyang proyekto nga gustong ipatuman mao ang drainage system, karsada ug uban pa. (/IBM)(BANATNEWS)