Duterte: Lagpad nga mga luna angay ihatag sa mga kabus

CEBU, Philippines — Gusto ni Presidente Rodrigo Roa Duterte nga ang mga nanag-iya og mga lagpad nga nga mga luna nga gitikad sa mga maguuma sa paghatag sa maong luna, samtang gusto sab sa pangulo nga ang luna duol sa row-houses nga pabalhinan sa mga apektado sa landslide sa Dakbayan sa Naga nga maila sab kini.

Si Duterte maoy nangulo sa ground breaking ceremony sa relocation site diha sa Balili Property alang sa mga biktima sa landslide gikan sa Barangay Tina-an, Naga City kagahapon.

Gipahinumdoman niya ang National Housing Authority ug ang kadagkoan sa siyudad nga libre kini apil na ang yuta duol niini. Si acting City of Naga Mayor Kristine Vanessa Chiong mikompirmar hinuon nga libre ug walay kinahanglang bayran ang mga survivors sa tukoron pang mga balay.

Tungatunga sa iyang speech, si Duterte mihisgot bahin sa mga adunahan nga maoy nanagiya og mga lagpad nga mga yuta dinhi sa Sugbo. Giawhag niya sila nga ihatag og balik ngadto sa mga maguuma ang maong mga luna ug mibahad nga kung dili nila kini buhaton, pugson niya sila paghimo niini.

“Ug naay moreklamo nako na mga saop o tenants unya moingon nako na wa gihatag, I will force you to surrender,” bahad pa ni Duterte kinsa gikuyogan nilang Senador Bong Go, Presidential Secretary for the Visayas Mike Dino, Congressman Eduardo “Eddiegul” Gullas ug Governor Gwendolyn Garcia.

Gikatakdang tukoron sa maong lugar ang 192 housing units alang sa mga pamilyang natabonan sa maong landslide niadtong Septiyembre 20 sa miaging tuig.

Kapin sa 70 ka tawo ang nakalas ug 444 ka pamilya ang nawagtangan og panimalay sa maong hitabo. Apan 213 lang ka pamilya ang gustong magkabalay samtang ang uban financial aid nga P150 mil gikan sa Financial and Building Assistance sa siyudad  aron matukod og balik ilang nangagusbat nga balay.  (/IBM)(BANATNEWS)