Tag-iya sa guesthouse pasakaan og reklamo

CEBU, Philippines – Kapolisan moduso og reklamo ngadto sa kagamhanan sa Dakbayan sa Lapu-lapu aron siradohan ang establisamento diin na-rescue ang unom ka babaye nga Chinese national niadtong Martes.

Si Lieutenant Colonel Dexter Calacar, hepe sa operations sa Lapu-Lapu City Police Office nibutyag nga pasakaan usab nila og kasong human trafficking ang tag-iya sa maong guesthouse sa pag-tolerate sa giingong prostitusyon. Nasayran nga na-entrap sa kapolisan ang giingong handler sa maong mga babaye diha sa A’s guesthouse sa Barangay Bankal, Dakbayan sa Lapu-Lapu niadtong Martes. Giingong ang modus niini diha sa guesthouse papuy-on ang mga babaye ug kuhaon lang kini sa mga lalaki nga Chinese national kon masirado na ang deal ngadto sa handler.

Matud ni Calacar nga bisan og nasayod ang tag-iya sa maong sestema wala kini moreklamo ngadto sa otoridad.

Nadiskubrehan sa mga otoridad nga kaniadtong Abril pa karong tuiga nagsugod ang maong negosyo sa maong mga Chinese national diha sa mao usab nga guesthouse.

Ang mga na-rescue nga babaye giingong wala pa gihapon kini mahinabi sa kapolisan tungod kay bisan usa kanila walay makahibawo o makasabot og pinulongang Ingles. Sa pagkakaron, giingong anaa sa kustodiya sa konsulado sa China  ang maong mga na-rescue samtang gitanggong sa detention cell ang gikatahong handler niini nga si Zhang Huan, 30-anyos.

Dugang ni Calacar nga kasamtangan pa nilang gisubay kon may koneksiyon ba kini sa una nang naronda sa National Bureau of Investigation-7 niadtong Agosto 5 diin 34 ka  Chinese national nga babaye usab ang na-rescue atol sa entrapment operation batok sa human trafficking diha sulod sa usa ka KTV bar sa maong dakbayan. (/BDB)(BANAT NEWS)