Gi-salvage ilubong nalang kun di kuhaon

CEBU, Philippines —  Gipatay nga CEO sa usa ka investment company nga giingong scam ilubong na lang sa taga punerarya kun wala gihapoy kabanay nga mokuha niini.

Ang hepe sa Balamban Police Station nga si Police Major Christian Torres nagkanayon nga usa ka buwan gikan niadtong Agosto 20, ipalubong na sa Gemma Funeral Homes ang maong patay’ng lawas kay mopaso na ang medisinang gibutang aron mapugngan ang pagkadugta niini. Niadtong Agosto 20 sa gabii napalgan didto sa daplin sa Transcentral Highway, Sitio Buli, Barangay Cansumoroy, Balamban si Armando Bernaldez Oppus ,34, lumad nga taga Davao City.

Napalgan sab ang iyang sakyanan nga tuyong gisunog ug gihagbong sa bung-aw diha sa Barangay Sunog.

Si Oppus gikatahong mao ang Chief Executive Officer sa Crowd Royals Real Estate Services didto sa Davao City diin nag-atubang kini didto og large scale estafa.

 Ang direktor sa Cebu Provincial Police Office nga si Police Colonel Roderick Mariano nagkanayon nga aduna nay nagpaila nga paryente sa biktima nga  mokuha sa patay’ng lawas karong semanahona.

Nanghinaot sila nga inig-claim sa lawas makig-alayon ang pamilya sa imbestigasyon.  (IBM) (BANATNEWS)