Skate park gilaraw sa Talisay

CEBU, Philippines – Usa sa mga plano ni Mayor Gerald Anthony “Samsam” Gullas Jr. mao ang pagtukod og skatepark alang sa mga mahiligon niini.

Una niini, ang batan-ong mayor nipahibawo nga sa iyang administrasyon ilang tagaan og pagtagad ang nagkalain-laing paugnat sa kusog lakip na dinhi ang extreme sports sama sa skateboarding.

Asoy pa niya nga usa kini ka programa aron malingaw ang kabatan-onan ug malikay sa walay ayong bisyo nga makaguba lang sa ilang kaugmaon.

Sa pagkakaron, ang siyudad wala pay skatepark nga mahatag hinungdan nga ang mahiligon sa skate sa bisan asa nalang sa karsada makita ug peligro hinuong maaksidente.

Niining bag-o, gitugotan ni Gullas ang mga batan-ong nagduwa niini nga gamiton ang sulod sa compound sa Talisay City Hall sugod sa alas 10 sa buntag hangtud sa alas 5 sa hapon matag adlaw nga Sabado ug Domiggo diha atubangan sa opisina sa Civil Service Commission (CSC).

Ang mayor niingon nga temporaryo lang una ang iyang mahatag kay nangita paman sab sila og lugar nga mahimo nila nga praktisanan.

Gawas sa extreme sports, posible nga maghimo sab si Gullas og liga alang sa mahiligon sa Mobile Legends, Dota ug uban pang online games nga gikahiligan na sab sa mga kabataan karon.

Matud pa nga dawaton man o dili, ang kamatuoran ang maong mga matang sa kalingawan ug paugnat sa kusog gidawat naman sa katilingban ug ang paggiya ug pag-regulate maoy labing maayong buhaton aron mapuslan kini sa positibong paagi. (/IBM)(BANAT NEWS)