4 departamento sa Kapitolyo gihimong division
CEBU, Philippines – Aprobado na sa Provincial Board ang pag-reorganize sa upat ka departamento sa Kapitolyo.
Ang Provincial Disaster Risk Reduction and Management Office (PDRRMO), Provincial Tourism Office, Cebu Provincial Anti-Drug Abuse Office (CPADAO) ug Cebu Provincial Investment and Promotions Office (CPIPO) mahimo na kini nga division ubos sa buhatan sa gobernador.
Ubos sa gipasar nga ordinansa, ang CPADAO aduna na lang unyay pito ka empleyado gikan sa 49; ang PDRRMO 10 na lang gikan sa 37; pito sa CPIPO gikan sa 30 ug pito gikan sa 50 ka empleyado sa PTO.
Si Gobernador Gwendolyn Garcia una ng nagkanayon nga daku ang madaginot sa Kapitolyo kun i-downgrade ang maong mga departamento.
Dili mominus sa P27 milyones ang gastuhon sa Kapitolyo matag buwan alang sa sweldo sa mga empleyado sa upat ka departamento.
Kun mapatuman na ang ordinansa, mominus na ang trabahante ug makadaginot og dili mominus P15 milyones matag buwan o P186 milyones matag tuig.
Ang ordinansa nga giulohan og Rationalization and Reorganization Program of 2019 gipangamahanan nila ni Bokal Edsel Galeos kauban nilang Bokal John Ismael Borgonia, Thadeo Jovito Ouano, Andrei Duterte ug Glenn Soco. (/GMR)(BANAT NEWS)
- Latest
