15-anyos nalumos sa sapa

CEBU, Philippines — Nalumos ang usa ka tinun-an sa Grade 9 dihang naligo kini sa sapa uban ang iyang mga higala sa may Barangay Mabasa sa Lungsod sa Argao niadtong Domingo sa alas 2:30 sa hapon.

Ang namatay mao ang 15-anyos nga si Steven Albaracin, taga Sitio Tipolo sa nahisgutang barangay.

Ang inahan niini nga si Armosila maoy nitaho sa kapolisan sa nahitabo sa iyang anak.

Matud ni Police Staff Sergeant Howard Mynopas, ang desk officer sa Argao Police Station, basi sa gihimong pakisusi sa ilang imbestigador, naligo sa sapa si Albaracin kuyog ang iyang mga higala nga paryente ra usab niya. Giingong naglayat-layat kini mao nga gituohan nga naigo ang ulo niini sa bato nga maoy hinungdan sa iyang pagkalumos.

Dugang asoy sa polis nga dali unta nga gitabang ang biktima pinaagi sa pagdala niini sa Argao District Hospital, apan nakutloan gayud kini sa iyang kinabuhi.

Sa inisyal nga imbestigasyon, disgrasya ang nahitabo ug walay foul play sa kamatayon sa batan-on mao nga gipaabot na lang sa kapolisan kon unsay plano sa pamilya sa namatay. (BANAT NEWS)