Luna sa ‘tore’ himoong parkingan

CEBU, Philippines – Himoon lang una nga parking space ang nabiyaan nga site nga tukuran unta sa 20-storey resource center sulod sa Capitol compound.

Matud ni Gobernador Gwendolyn Garcia nga dili mahimo nga magpabilin ra ang sitwasyon sa maong luna diin aduna nay lawom nga kawot.

"Kinahanglan gyud na mabalik to level ground, dili lang pagbalik, dili lang pag-backfill, kinahanglan i-compact pud," matud ni Garcia.

Gitataw sa gobernador nga wala siyay plano nga mogasto alang sa pag backfill sa luna sanglit ang kinahanglan mogasto niini mao ang "sad-an".

Ang pagtrabaho sa resource center gipaundang ni Garcia sa unang adlaw pa niyang paglingkod sa pwesto.

Ang gobernador nagkanayon nga mas maayo nga himoon lang una nga parking area ang maong luna ilabi na nga wala nay ka parkingan ang mga sakyanan sulod sa Capitol compound.

"Ang initial gyud ana i-parking 'sa na, until we will be able to plan more judiciously and more responsibly what to do with government property," matud ni Garcia. (/GMR)(BANAT NEWS)