‘Kawatan’ og manok gipatay sa iyang ig-agaw
CEBU, Philippines — Gipusil-patay ang usa ka lalaki kinsa gituohang nangawat og manok sa iyang ig-agaw sa may Sitio Kalubihan, Brgy. Luray II, Dakbayan sa Toledo niadtong Sabado sa buntag.
Giila ang gipusil nga si Nifer Mabida Abellana, 37-anyos ug ang nagpusil kaniya nga ig-agaw nga si Chito Mabida, 34-anyos residente ra sab sa dapit.
Basi sa imbestigasyon ni Police Staff Sergeant Jonathan Cueson, ang gipusil, giila nga notorious na nga kawatan sa ilang lugar.
Asoy sa mga silingan nga niadtong Biyernes sa gabii nakadungog silag buto sa armas dapit sa panimalay ni Nifer apan wala ni nila panumbalinga.
Pagka alas sais sa buntag na sa Sabado nadiskubrehan sa iyang mga silingan ang patayng lawas niini sa sulod sa iyang balay nga adunay igo sa iyang agtang. Sa follow-up nga imbestigasyon, mitahan sa iyang kaugalingon ang suspek ngadto sa police station.
Matud ni Mabida, grabe na ang iyang kalagot kang Nifer kay kanunay siyang kawatang niini og manok hinungdang nga napuno na siya niini.
Kasamtangan nagtingkagol ang suspek ug nag-atubang na kinig kasong murder samtang gihaya na ang ang iyang ig-agaw sa pinuy-anan niini. (/DILT)(BANATNEWS)
- Latest
