Pagpatay kang Ramirez susama kang Blanco

CEBU, Philippines — Blangko pa ang Special Investigation Task Group sa mga nagpatay ingon man sa utok sa pagpatay kang kanhi Medellin mayor Ricardo “Ricky” Ramirez.

Ang tigpamaba sa Cebu Provincial Police Office nga si Police Lieutenant Colonel Eloveo Marquez nagkanayon nga kalambigitan sa ilegal nga drugas ug personal nga panagbangi ang ilang gitutukang anggulo sa krimen. “Naglisud gyud ta wala pa ta’y person of interest, wala pa ta kahibawo sa identity, sa maong mga assailants or sa mastermind,” matud ni Marquez.

Dugang ni Marquez nga nakamatikod sila nga susama sa nahitabo ni Ronda Mayor Mariano Blanco ang pagpatay kang Ramirez.

Ang duha parehong gikataho nga nalambigit sa ilegal nga drugas.

Si Blanco gisulong sa mga armadong tawo samtang natulog sulod sa iyang buhatan sa munisipyo sa Ronda.

Nasayran nga si Ramirez gisulod sab sa mga armadong tawo niadtong Martes sa gabii sa Bogo-Medellin Corporation Medical Center diin siya gi-hospital arrest.

Gituohang daku ang posibilidad nga susamang grupo ra ang nipatay sa duha ka mayor.

Samtang ang chairman sa Commission on the Laity sa Archdiocese of Cebu nga si Fe Mantuhac Barino nasubo sa nahitabong pagpusil patay kang Ramirez sulod sa tambalanan.

Matud ni Barino nga ang hospital angayan kini hatagan og pagrespeto tungod kay mao kini ang dapit nga adtoan aron pag-ayo sa mga masakiton ug pagluwas sa kinabuhi.

Ang Commission on Human Rights 7 sa ilang bahin nikondenar usab sa nahitabong pagpatay kang Ramirez sulod sa tambalanan.

Ang CHR-7 mohimo og monitoring sa dagan sa imbestigasyon sa kapolisan may labot sa kamatayon sa kanhi mayor. (GMR) (BANAT NEWS)