P3.3B ibilin ni Luigi kang Jonas

CEBU, Philippines – Mapasigarbuhong gipahibawo ni outgoing Vice Mayor Carlo Fortuna nga P3.3 bilyones ang pundo sa panudlanan sa kagamhanan sa Dakbayan sa Mandaue ang ilang itugyan ngadto sa bag-ong administrasyon ni Mayor-elect Jonas Cortes.

Matud ni Fortuna nga ang maong pundo gikan sa ilang koleksyon sukad Enero niining tuiga hangtud sa pagtapos sa ilang administrasyon ni outgoing Mayor Gabriel Luis Quisumbing.

Gitataw ni Fortuna nga naandam na ang mga gikinahanglang dokumento sa matag departamento alang sa turnover.

Usa sa nagkinahanglan og dinaliang aksyon ang problema sa paglabay og basura.

Dugang sagubangon sa mosunod nga administrasyon ang kaugmaran sa merkado publiko sa karaan nga nahimutangan niini nunot sa kalangan sa kontraktor.

Si Fortuna nagsilbing acting mayor sugod niadtong Hunyo 5 sanglit on leave si Quisumbing ug giingon nga atua kini sa gawas sa nasud alang sa tulo ka semana nga bakasyon. (/GMR)(BANAT NEWS)