Hapon, bata nangalumos

CEBU, Philippines — Dive Instructor nga Hapon ug usa ka bata ang nangalumos sa managlahing insidente dinhi sa Sugbo niadtong Domingo.

Sa Nalusoan Island, Olango Reef, sa lungsod sa Cordova niadtong Domingo nalumos ang usa ka Takumi Shiraishi ,39, nga usa ka Japanese national ug dive instructor.

Si Shiraishi sab ang tag-iya sa Aquarius Dive Shop sa Barangay Maribago sa maong dakbayan.

Ang mga sakop sa City  Disaster Risk Reduction Management Office (CDRRMO) sa Dakbayan sa Lapu-Lapu pinangulohan ni Andy Berame miingon nga nag-scuba diving ang maong Hapon sa Nalusuan Island niadtong adlawa.

Giingong nahibulong ang mga kauban ni Shiraishi nga 70 minutos na kini sa ilawom apan wala pa gihapon motunga hinungdan nga gipangita kini nila sa ilawom ug didto nakit-an nga wala na kini panimuot.

Dali nilang gidala ang Hapon sa daplin ug gidala sa tambalanan apan nakabsan kini sa kinabuhi.

Sigun pa sa hepe sa Cordova Police station nga si Police Captain Efren Diaz padayon nilang giimbestigar ang maong insidente.

Samtang sa Molobolo Hot Spring Beach Resort sa Barangay Molobolo, Tuburan, usa ka 6-anyos nga batang lalaki ang nalumos human gikatahong kini nataligam-an sa nagbantay samtang kini naligo didto.

Ang nakalas mao si Mark Dave Baterna, taga Sitio Cadaatan, Barangay Fortaleza sa maong lungsod.

Matud pa ni Police Sergeant Achieles Bacorta, Desk Officer sa Tuburan Police Station, nangaligo sa dagat ang pamilya sa bata.

Giingong milakaw ang inahan sa bata ug gibilin kini sa mga hamtong nga paryente kay mangompra kini og pagkaon sa merkado.

Apan giingong nataligam-an kini nga naligo sa dagat ug diha nalang kini nakit-an sa dihang nilutaw na sa dagat.

Sumala pa ni Bacorta gidala sa Tuburan District Hospital ang bata, apan gideklarar kini nga dead on arrival.

Ang kapolisan mipasidaan nga kun mangaligo sa dagat kinahanglang dili pasagdan ang mga bata ilabi na kadtong dili makamaong molangoy. (BANAT NEWS)