“Failure of elections” gitinguha ni Evasco

CEBU, Philippines – Si gubernatorial candidate Leoncio Evasco Jr. sa Lalawigan sa Bohol, nagtinguha karon nga moduso og petisyon aron sa pagdeklara og failure of elections tungod sa massive vote buying sa ilang lugar.

Nakadawat si Evasco og mga taho nga gisanapan og vote buying sa iyang mga kaatbang sa politika ang halos tanang lungsod sa probinsiya lakip na ang Tagbilaran City hinungdan sa dakung posibilidad sa iyang kapildihan.

Tungod sa daghang mga konsiderasyon ug mga panghitabo, miabot sa punto si Evasco nga himuon ang labing lisod nga desisyon sa pagmando sa Nationalist People’s Coalition-Bohol ug Hugpong Pagbabago-Bohol sa pagpangandam alang sa pagduso og petition to declare a failure of elections.

Dugang niini nga bisan ang Commission on Elections motugot o dili sa ilang petisyon, ila gihapon kining ipadayon hangtod nga dili mabalibaran ang ilang giandam nga mga remedyo sa reklamo.

Si Evasco nagkanayon nga dili para niya ang maong reklamo apan alang sa tanang Boholano kay angay nila ang tukma nga mga mananaug.

Una nang gipahibawo niini nga andam siyang modawat sa iyang kapildihan gani mapasalamaton siya sa tanang misalig sa iyang kandidatura. (/DILT)(BANAT NEWS)