“Manghilabot” gipatay diha sa Barangay Carreta
CEBU, Philippines — Patay ang usa ka 22-anyos nga lalaki human gipusil sa wala mailhing mamumuno sa may J. De Vera Street, Barangay Carreta ning Dakbayan sa Sugbo kagahapon sa hapon.
Ang gipusil patay mao si Julius Sabangan, residente sa maong lugar. Matud pa ni Police Master Sergeant Antonio Din, investigator sa Mabolo Police Station naglakaw ang biktima sa maong lugar kuyog ang mamumuno.
Sa walay daghang estorya gipusil sa maong lalaki ang biktima ug daling niikyas sa lugar. Ang mga sakop sa Emergency Medical Service nga niresponde wala na makadala kang Sabangan sa tambalanan gumikan kay nabugtoan na kini sa kinabuhi.
Dugang pa ni Din, palawoman pa nila ang imbestigasyon sanglit ang igsuon sa namatay namahayag nga tiggamitan kini og ilegal nga drugas ug manghilabot usab og dili iyang mga butang.
Usa sa gitan-aw sa kapolisan nga posibleng dunay nakaaway ang biktima ug kini gipanimaslan. (/IBM)(BANATNEWS)
- Latest
