Balay sa duha ka kapitan girakrakan

CEBU, Philippines – Mga balay sa duha ka mga barangay kapitan sa Dakbayan sa Sugbo nga kaalyado ni Mayor Tomas Osmeña gipangrakrakan sa mga wala mailhing tawo kagahapon sa kaadlawon.

Ang girakrakan mao ang panimalay nilang Sudlon Dos Barangay Captain Pricillo Albores ug ni Sinsin Barangay Captain Aurelio Ascuña.

Base sa report sa Cebu City Police Office, kaadlawon nahitabo ang pagrakrakan sa panimalay ni Albores sa lima ka wala mailhing tawo.

Adunay saksi nga nagingong sakay sa mga motorsiklo ang lima ka mga tawong nagsuot og bonnet sa ilang mga nawong ug armado og mga long ug short firearms.

Sunod nga girakrakan ang balay ni Ascuña sa upat ka mga lalaking nagsakay og motorsiklo ug daling miikyas padung sa siyudad.

Nakuha sa kapolisan ang daghang basiyo sa bala sa kalibre .9mm, mga basiyo sa bala sa M16; mga basiyo sa bala sa kalibre .45 ug slugs gikan sa dapit.

Walay bisan usa nga naigo niini. Hangtud niining pagsuwat sa balita blangko ang kapolisan sa motibo sa maong pagpamusil.

Si Albores nitug-an sa Banat News nga karon pa kini nahitabo ug nabalaka sila sa ilang seguridad. Si Laspuña sa iyang bahin nagtuong ang nagrakrak sa balay ni Albores  ug sa iyaha mao ra.

Si Osmeña dala ang mga kaalyadong kapitan miadto sa panimalay ni Albores ug mihulagway nga politically motivated kini.

Gimandoan niya ang kapolisan pagsulbad niini sud sa napulo ka adlaw kay kundili suspensuhon niya ang allowances sa tanang polis nga nadestino sa bukirang barangay sa siyudad.

“Every indication is consistent with other circumstances that it is politically motivated, I’m giving Col. (Royima) Garma 10 days to solve this and if it is not solved within 10 days, I will accuse the police of being behind this. And I will suspend all the allowances of the police assigned in mountain barangays, we give them incentive allowance, clearly there is no incentive, they are targeting only BOPK barangay officials, Sinsin, Sudlon, Lusaran, but they will not touch Sudlon I because he is Barug, that’s Team Rama”, ni Osmeña pa.

Matud sa mayor gustong hadlukon ang mga barangay kapitan sa BOPK ug siya namasangil nga mga polis nga gigamit sa politika ang naghimo niini.

Sumala pang Osmeña iyaha ng gisumbong kang Presidente Rodrigo Duterte ang nahitabo.

“I already mention it to him (Duterte). He said just provide information, so we’re now documenting and give it to the President. I told the President I’ve known you for a long time he never run after Nograles, that’s he’s number enemy from day 1. He wanted to kill Nograles he can do it in 2 seconds, he’s not like that,” dugang sa mayor kinsa nitanyag og P100 mil nga ganti sa makatug-an kinsa ang naghimo niini.

Gusto niya karon ipaubos as Comelec control ang siyudad kay samok ang umaabot piniliay sa Mayo 13.

Apan si Garma wala makauyon sa pasangil ni Osmeña nga polis ra sab ang nangrapido.

“Buti pa siya may conclusion. We’re investigating it pero unang tanong naming, eh baka away politika ‘yan or baka personal o baka love triangle. We still know nothing. Kaya iimbestigahan pa naman ng polis,” si Garma nagkanayon ug  miawhag sa mga kapitan nga mokooperar sa imbestigasyon.

Wala sab sila mahadlok nga kuhaan sila og allowance kay sukad nga siyay milingkod sa CCPO wala na mohatag niini ang mayor.

“The problem with these people is that they keep telling that they will pull out any support etcetera. Would you believe that according to our people since I assumed wala namang allowance natatanggap ang polis namin.  And the support we’re receiving is gasoline?” si Garma nagkanayon.

Giklaro sab ni Garma nga dili si Osmeña ang iyang giserbisyohan kondili ang katawhan sa dakbayan.

Nakasabot sab siya paghingalan kaniyang ‘worst city director’ kay sukad-sukad wala siya moluhod kang Osmeña tungod kay ang iyang gisunod mao ang balaod. (Camille Pateres/IBM)(BANAT NEWS)