Vandal sa UP-Cebu susihon sa CIDG

CEBU, Philippines —  Gitahasan ang Criminal Investigation Detection Group-7 ni Police Brigadier General Debold Sinas, ang regional director sa Police Regional Office-7, sa pagpahigayon og imbestigasyon subay sa nahitabong pag-vandal sa University of the Philippines-Cebu.

Buot ni Sinas nga makig-alayon ang CIDG-7 sa mga kadagkuan sa maong unibersidad aron matutokan ang maong insidente.

Sumala sa director nga kinahanglan imbestigahan ang maong pagpamandal aron masayran ug mailhan kon kinsa ang naghimo niini. Kahinumduman nga niadtong miaging Biyernes, Marso 29 nadiskubrehan nga gibandalan ang atubangag bahin sa maong tunghaan diin gamit ang pintal, adunay suwat nga: CPP NPA Salot.

Nunot niini, nagtinguha ang nagdumala sa maong tulonghaan nga susihon ang maong hitabo. DILT (BANATNEWS)