Illegal LPG refilling station gironda

CEBU, Philippines – Mokabat P4 milyones nga balor sa mga disposable butane canisters ug mga gamit sa pag-refill niini og liquefied petroleum gas sa giingong illegal refilling station ang nasakmit sa hiniusang pwersa sa Provincial Intelligence Branch, Provincial Mobile Force Company,Talisay City Police ug mga sakop sa Department of Energy diha sa Sitio Mananga 1, Tabunok, Talisay City. Unom ka mga tawo usab ang ilang nadakpan.

Ang nasikop mao sila si Sharekann Agriam Bernabat (operator sa illegal refilling station sa butane gas), Joshua Padin Gasalatan, Harold Veroy Ladrona, Fernand Cueme Badille, Rolito Camocamo Racaza (checker) ug Richard Gohil Hepiga.

Ang unom pasakaan og kasong paglapas sa P.D 1865 o illegal (Refilling/Sale and Distribution of Liquefied Petroleum Gas).

Nasakmit sa kapolisan ang mga gamit pag refill og LPG sa mga disposable butane canisters, mga dagkong tangke sa nagkalain-laing mga LPGs.

Lakip sa nakuha ang 3 units refilling pneumatic machines, mga air compressor, upat ka sakyanan, duha ka motorsiklo, mga timbangan, 3,558 ka lata nga duna nay sud nga LPGs, 2397 ka basiyong lata.

Si Police Senior Inspector Alejandro Batobalonos , Team leader sa raiding team miingon nga ang DOE nakadawat og reklamo gikan sa mga residente sa lugar bahin sa operasyon sa maong refilling station. Ang pagbutang og LPG sa mga unta iglalabay nga lata sa butane giingong peligro ug pipila ka mga nahitabong sunog sa Sugbo nahitabo tungod sa pagbuto niini samtang gigamit pagluto.

"Actually dugay nato siya naabot na complaint, kay nagreklamo napud ang mga residente didto, kay wala man gud sad nay hunong ilang operasyon, ug kana magkarga sila madungog man gud na labi na ig -refill nila, mao nakuyawan sila," matud pa ni Batobalonos. (/IBM)(BANAT NEWS)