60 ka priso mo-graduate sa SuGod

CEBU, Philippines – Ang 60 ka mga piniriso sa Cebu City Jail Male Dormitory nga nipaubos sa Surrender to God (SuGod) Program sa Archdiocese of Cebu ang mo-graduate karong adlawa.

Gipahibalo sa tsirman sa Commission on the Laity ug Executive Director sa SuGod Program Fe Barino nga ang 60 nga mo-graduate kabahin kini sila sa liboan ka mga piniriso nga nalambigit sa ginadiling drugas ug gikatakda nga makagawas sa prisohan ubos sa plea bargaining agreement.

Gitug-an ni Barino nga sa dili pa makagawas sa prisohan ang mga inmates, ang SuGod mipahigayon og recovery ug renewal program sulod sa prisohan aron pag-andam kanila nga dili na mobalik sa ilang bisyo sa paggamit o pagpamaligya og ginadili nga drugas.

Gibutyag sab niini nga basi sa iyang pakighinabi kang Jail Supt. Renante Rubio ang jail warden sa CCJ, sobra sa tres mil ka mga priso ang mi-apply og plea bargaining agreement, diin ang ilang silot mao ang imprisonment o rehabilitation.

Kon mapamatud-an nga low ug moderate risk sila sa pagka adik, ipaubos sila sa community based program inig gawas sa prisohan.

Matud pa ni Barino, lisod ang pagpatuman sa community-based rehab program kay dili man mo-report ang mga binuhian nga piniriso sa usa ka oras matag semana sulod sa unom ka bulan hinungdan nga nakig-alayon ang SuGod sa mga kadagkuan sa Korte ug sa Department of Health nga usbon ang pamaagi ug himuon ang rehab sulod sa prisohan sa dili pa sila buhian. Kini sama sa gibuhat sa SuGod nga ilang gilauman nga mahatagan og sulbad kay sila nagtuo nga walay imposible sa Ginoo.

Ang SuGod libre kini nga programa sulod sa CCJ ug aduna na usab migradwar sa milabay nga tuig sa sulod mismo sa prisohan. (/DILT)(BANAT NEWS)