29 ka tawo sikop sa SEMPO sa managlahing lugar
CEBU, Philippines – Nikabat ngadto sa 19 ka tawo ang nasikop atol sa gipahigayong Synchronized Enhancement Managing Police Operations (SEMPO) kagahapon sa kadlawon kinsa giingong nalambigit sa ilegal mga pagduwa og poker diha sa Barangay Kamputhaw, Dakbayan sa Sugbo.
Nasikop ang assistant manager sa establisamento nga si Precy Montebon Impas, Maricel Montebon Esmaya ug Arena Zamora ug laing usa ka empleyado, usa ka card dealer ug 14 ka player. “Matagal na ‘to nag-operate this the pending project of CIDG, when I was the regional chief of CIDG itinuloy kuna ngayon, dini-develop na namin to when I was in CIDG pa at ilegal talaga wala talagang authority, walang permit”, matud sa direktor sa Cebu City Police Office (CCPO) Police Senior Superintendent Royina Garma.
Ang mga suspetsado mag-atubang og kasong kalapasan of Presidential Decree (PD)1602 kun “Illegal Gambling” .
Sa laing bahin, gitug-an sa hepe sa kapolisan sa Siyudad sa Talisay Police Superintendent Marlu Conag nga kasagaran nga ilang nadakpan karon kalambigitan sa ilegal nga drugas mga bag-ong player.
Kini gumikan sa sunod-sunod nilang operasyon diin nangasikop ug adunay napatay nga mga karaang durugista.
Matud ni Conag nga adunay mga nasikop ug adunay mopuli usab sa ilegal nga operasyon.
Ang ulahi nilang operasyon nikabat ngadto sa P1 milyon ang kantidad sa ilegal nga drugas ang ilang nasakmit gikan sa bag-ong drug player.
Sa pakisusi sa kapolisan giingong gikan sa prisohan ang transaksiyon sa ilang mga nadakpan.
Sa laing bahin usab, nasikop sa managkalahing anti-illegal drug operation sa kapolisan ang 10 ka suspetsadong pusher sa Lungsod sa Consolacion ug Dakbayan sa Lapu-Lapu diin kapin sa 30 ka gagmay nga paketeng shabu ug mga drug paraphernalia ang nasakmit.
Si Police Officer 2 Jesus Bernardo Lucmayon sa Consolalacion Police Station miila sa ilang nadakpan nga mao si Niel Suarez Siangco. 33, napuyo sa Barangay Cabangahan, Lungsod sa Consolacion.
Nasakmit gikan sa maong dinakpan ang 15 ka gagmay nga paketeng shabu ug kahimanan sa paggamit ug pag-repack sa ginadiling drugas.
Sa Sitio Ibapu sa Barangay Mactan, Dakbayan sa Lapu-Lapu kagahapon sa kadlawon nadakpan sila si Dave Ian Terol Bojos, 42, Marino Gastador Itomay, 56, Jefferson Peleño Pejara, 30-anyos, pulos nagpuyo sa maong dapit.
Si Chief Inspector Miguel Andeza, hepe sa Presinto 2 sa Lapu-lapu City Police Office (LLCPO) nibutyag nga ilang nasakmit gikan sa maong mga dinakpan ang walo ka gagmay nga paketeng shabu ug P600 nga ilang gituohang halin sa ginadiling drugas.
Laing nadakpan sa Zone Sunlot, Barangay Kalawisan sa Dakbayan sa Lapu-Lapu mao sila si Pascual Pacaldo Tampus, 51 ug Niña Caño Baguio, 30, pulos nagpuyo sa maong dapit ug nasakmit gikan kanila ang 14 ka gagmay nga paketeng shabu, P300 nga gituohang halin ug P200 nga buy bust money.
Dugang nadakpan sa Sitio Tangke, Barangay Basak, sa maong siyudad si Abelardo Devera, 37, habal-habal driver, taga Barangay Pajo nakuhaan og pito ka gagmay nga paketeng shabu, P300 nga gituohang halin niini sa ginadiling drugas ug P200 nga buy bust money.
Nadakpan usab sa Sitio Tamiya, Barangay Basak sa mao gihapong dakbayan ang laing pusher nga si Bernardo Ephan Orbeta, 30, habal-habal driver usab, taga Barangay Babag sa maong dakbayan nasakmitan og pito ka gagmay nga paketeng shabu, P300 nga gituohang halin niini ug P200 nga buy bust money.
Sa Sitio Datag, Barangay Maribago sa nasikop si Jojie Pablo Betanghol, 36 , Rosalie Daño Dorado, 34, pulos taga Barangay Agus sa maong dakbayan ug nasakmit gikan kanila ang upat ka gagmay’ng paketeg shabu. (Romeo T. Limpangog ug Gabriel C. Bonjoc/BDB)(BANAT NEWS)
- Latest