Babaye gilubong human giingong napatay sa uyab
CEBU, Philippines – Usa ka patay’ng lawas sa babaye ang napalgan diha sa Sitio Bairan, Barangay Captain Claudio bukiran nga bahin sa Dakbayan sa Toledo niadtong nakalabay’ng adlaw.
Ang biktima naila lang sa pangalang “Joan” gibana-bana nga nagpangidaron sa 30-anyos ug gituohang taga Dakbayan sa Carcar.
Ang biktima blonde og buhok nagsul-ob og sleeveless nga kolor blue ug puti nga pajama.
Ang giingong uyab sa maong babaye nga si Ponsiano Tapao, 40-anyos ang gituohang responsable sa krimen.
Si Adriano Barsabal Sigue, 57, usa ka mag-uuma, taga Barangay Matab-ang, Siyudad sa Toledo ang nitaho diha sa Toledo City Police Station kalabot sa napalgang patay’ng lawas sa biktima.
Si Senior Police Officer 3 Thule Tajadlangit uban sa laing police personnel ang daling niresponde sa maong taho.
Base sa imbestigasyon sa kapolisan nga si Roldan Tano Abella 30-anyos, residente sa Sitio Gairan Barangay Captain Claudio nibutyag nga niadtong buwan sa Nobiyembre, 2018 nibisita kini sa panimalay ni Tapao.
Si Abella niadtong higayona mangayo unta og mga utanon kang Tapao apan giingong kalit nga nisugilon kaniya ang suspetsado nga napatay niya ang iyang uyab nga si Joan.
Giingong tungod sa tumang selos gituok ni Tapao ang iyang uyab gamit ang panyo ug dihang wala na kini magginhawa dali kining gilubong sa suspetsado diha duol sa iyang pinuy-anan.
Si Tapao nisibat kini ug padayon pang gipangita sa kapolisan.
Niadtong Enero 8, 2019 sa udto duol sa panimalay sa suspek adunay nakabkab nga bahin sa nidahili nga yuta ug nangalisbo ang baho sa patay.
Hinungdan nga gikubkob kini sa mga barangay tanod sa lugar ug nakita nila ang nadugta na nga patayng lawas sa biktima. (/BDB)(BANAT NEWS)
- Latest
