Koneksyon ni Gabuya kang Dumpit gisusi

CEBU, Philippines — Adunay laing duha ka anggulo karon nga gisubay ang mga imbestigador bahin sa pagpatay kang Guihulngan City Deputy Police Chief Senior Inspector Porferio Gabuya Jr. human ang mga rebeldeng New Peoples Army gikatahong mihimakak nga sila maoy nipatay sa maong opisyal.

Si Superintendent Christopher Navida, hepe sa Guihulngan Police Station mitug-an sa  Banat News pinaagi sa interview sa telepono nga aduna’y duha ka bag-ong anggulo sila nga gisundan.

Kini mao ang work-related tungod sa gipangusgang kampanya sa ilang buhatan batok sa mga loose firearms ug ang matud pa pagka-link ni Gabuya sa gipatay usab nga polis nga si SPO2 Adonis Dumpit.

Si Gabuya ug Dumpit parehong mga sakop kaniadto sa Special Weapons and Tactics (SWAT) sa Cebu City Police Office ayha pa sila nagkabuwag human si Dumpit napriso tungod sa kasong homicide ug dihang nakabalik kini sa serbisyo gibalhin kini ngadto sa Bohol diin kini napatay sa operasyon sa National Bureau of Investigation sa usa ka anti-illegal drugs operations pipila ka buwan na ang nakalabay.

Una niini, ang kapolisan namahayag nga nagduda silang binuhatan sa mga rebeldeng NPA ang pagpatay kang Gabuya tungod kay sige naman sila  makadawat og mga impormasyon nga atakihon sila sa mga rebelde.

Gawas pa niana, aduna say mga text messages nga giingong mikatap human sa pagpamusil kang Gabuya nga giingong giangkon sa mga NPA ang maong krimen.

Apan ang maong text wala gipagawas sa kadagkuan sa kapulisan nga gipanguluhan ni Chief Superintendent Debold Sinas.

Apan niining bag-o, giingong gihimakak sa NPA nga sila maoy nagpatay kang Gabuya niadtong Miyerkules sayo sa buntag.

Si Navida niingon nga wala’y derogatory record si Gabuya sukad nga kini nadestino sa maong siyudad duha ka buwan na ang nakalabay.

Ang Special Investigation Task Group o SITG pangulohan sa Provincial Investigation and Detective Management Branch sa Negros Oriental Provincial Police Office.

Gihuptan na karon sa imbestigador ang kopya sa CCTV camera sa crime scene og aduna na pud tulo ka witnesses. Apan naglisod pa sila pag-ila sa mga dagway sa mga mamumuno tungod kay nag face mask sila ug nigamit og sunglasses.

Ang patay nga lawas ni Gabuya nabalik na sa Cebu, diin ihaya ni sa Talisay City diin nagpuyo ang iyang kabanay. (/IBM)(BANATNEWS)