Wa kinahanglana ang traffic enforcers sa SRP

CEBU, Philippines — Dili mopakatap og traffic enforcers ang Cebu City Transportation Office(CCTO) sa Cebu South Coastal Road(CSCR) tungod kay dili man huot ang trapiko sa lugar sumala pa ni CCTO Operations Chief Francisco Ouano.

Kagahapon sa hapon iyang gibisita ang lugar human ang RSF Firm nga maoy tag-iya sa amusement rides nga gi-establisar sa South Road Properties(SRP) mi-request og deployment sa traffic enforcers.

Gisusi sab ni Ouano ang parking area nga nahimutang duol sa SRP Sugbo grounds.  Ang Boom na Boom niabang sa bakanteng luna sa Filinvest Land Inc.(FLI) alang sa ilang operasyon. Imbes nga traffic enforcers, ang mobile patrol group sa CCTO mo-roving matag karon ug unya sa lugar aron pag-monitor sa traffic situation.

Niadtong Sabado sa gabie ang recreational activities nga gitawag og “Boom na Boom sa Sugbo” opisyal nga gibuksan sa publiko nga diin pinasidunggang dinapit si kanhi Special Assistant to the President Christopher ‘Bong’ Go. Gilauman nga modagsa ang mga tawo sa SRP gumikan sa carnival rides nga giandam sa RSF firm.  Ang presyo sa mga rides nagsugod sa P30 ngadto na sa P50 ug entrance fee nga P20 sa weekdays ug P25 sa weekends ug holidays. (/IBM)(BANATNEWS)