51 ka priso nigradwar sa Sugod

CEBU, Philippines – Ang 51 ka lalaking priso sa Cebu City Jail nga nipaubos sa Plea Bargaining Agreement ang nigradwar kagahapon sa Surrender to God Recovery and Renewal Program Batch 2.

Usa ka Santos nga Misa ang gipahigayon ni Padre Ciano Ubod sa prison ministry nga gitambongan sa mga priso nga adunay kaso sa ginadiling drugas nga nipaubos sa upat ka adlaw nga programa sa Cebu Archdiocesan Program for Drug Dependents. Giawhag ni Ubod ang mga nigradwar nga padayonon ang kabag-ohan bisan sa daghang pagsuway ug hagit sa ilang kinabuhi.

Human sa Santos nga Misa gisunod ang graduation sa mga recovering addicts diin gi-welcome sila pinaagi sa pag-ampo ug paghatag kanila og bibliya ug modangop sila sa krus diin nagbitay si Kristo.

Usa sa nigradwar si Jojo Cabasag kinsa nagkanayon nga ang iyang kabag-ohan dili lang para kaniya apan lakip sa iyang pamilya.

Samtang si Fe Barino, executive director sa Sugod nitug-an nga nihimo sila og kalihukan diha sa prisohan tungod kay ang mga priso labing nanginahanglan og tabang. -/BDB (BANAT NEWS)