Libreng sakay sa BPOs nasugdan na
CEBU, Philippines — Hapsay ra ang dagan sa unang adlaw sa free bus ride alang sa mga Business Processing Outsourcing (BPO) workers o mga call center agents kagahapon.
Matud sa Operations Chief sa Cebu City Transportation Office(CCTO) Francisco Ouano walay nasugatang problema sa libreng sakay sa bus sa mga call center agents sa Cebu IT Park. Ang pangulo sa Department of General Services (DGS) Ronaldo Malacora miasoy ang matag bus mipasakay og dili momenus napulo ka mga BPO workers.
Upat ka city-owned buses nga moabot sa 50 ka tawo ang kapasidad ang available gikan sa alas- 12 sa tungang gabii hangtod na sa alas- 6 sa buntag gikan sa pick-up area sa J.M del Mar Avenue/Geonzon Street bus stop.
Ang unang rota gikan sa pick-up area paingon sa JY Square lahos sa area sa Capitol Site padulong sa Fuente Osmeña paingon sa Harrison Park, padung sa Abellana National School dayon Metro Colon ug vice versa.
Ikaduhang rota gikan sa pick-up area padulong sa corner F. Cabahug Street paingon sa Mabolo Church lahos sa dalan Hipodromo paingon sa T. Padilla dayon Osmeña Boulevard padung sa Metro Colon ug vice versa.
Ang matag rota dunay gi-assign nga duha ka bus. Si Malacora miingon nga sa week days lauman nga modagsa ang mga call center agents mopahimulos sa libreng sakay sa bus.
Samtang ang dry run sa ikatulong rota sa “special shuttle service” nagsugod kagabii. Si Nanette Garong, pangulo sa Call Center Program miingon ang ikatulong rota gikan sa Juan Luna Avenue paingon sa Cebu IT Park ug vice versa.
Gikan sa alas 9 sa gabii hangtod na sa alas- 5 sa buntag diin usa ka coaster ang gitagana alang sa maong rota.
Dunay lima ka mga sakop sa Barangay Intelligence Network (BIN) ang gi-assign aron mobantay sa seguridad sa dapit. (BANAT NEWS)
- Latest
