100 home lots i-award sa mga nasunogan

CEBU, Philippines – Ang mga nasunogan niadtong buwan sa Oktubre niining tuiga diha sa Sitio Cahipa, Barangay Hipodromo, Dakbayan sa Sugbo ang makatukod na unya og balik sa ilang mga balay.  Ang Operations Chief sa Division for the Welfare of the Urban Poor (DWUP) Genevieve Alcoseba nibutyag nga giabunohan nila ang Ortega property tungod kay lupa kini.

Ang maong lote napanag-iya na kini sa siyudad ug maoy balhinan sa mga naapektohan sa sunog.

Giingong hapit na mahuman sa pag-abuno ang lugar ug kagahapon ang technical team sa DWUP nibisita sa lugar ug nagpahigayon kini og home lot survey. Matud sab ni Alcoseba nga makig-alayon sila sa Visayan Electric Company (VECO) ingon man sa Metropolitan Cebu Water District(MCWD) aron pagtrabaho sa poste ug linya sa tubig.

Gipahibawo usab ni Alcoseba nga kon makabalik na og tukod sa ilang pinuy-ana ang mga naapektohan sa sunog pwede silang mo-avail sa ‘Let There Be Light’ Program sa siyudad.

Gipalambo sa DWUP ang Let There Be Light Program diin kadtong mga naapektohan sa sunog kon magpataod og balik sa linya sa kuryente, ang DWUP adunay kaugalingong electricians. Ug ang bayaran nalang sa kliyente ang mga materyales nga mokabat sa P2,000 ngadto sa P3,000 ug wala nay laing galastohan.

Tinguha sa DWUP nga karong buwana i-award ang 100 ka home lots ug human niini mahimo na nga makapabarog og balik ang mga residente sa ilang mga pinuy-anan. (/BDB)(BANAT NEWS)