Mag-uuma namatay sa kulata

CEBU, Philippines — Patay nang napalgan nga giingong naputos og bun-og ang kalawasan sud sa ilang panimalay ang 33-anyos nga mag-uuma  sa Sitio Bayabas, Barangay Masaba,  Dakbayan sa  Danao sa miaging buntag. Si Senior Police Officer 4 Reynante Manulat nga maoy chief investigator sa Danao City Police Station miila sa biktima nga mao si Noel Molabo, nagpuyo sa maong dapit.

Matud pa ni Manulat ang kapuyo sa namatay nga si Jelyn  Diamante maoy nakadiskubre kaniya sa pag-uli niini sayo sa buntag kagahapon.

Dugang pa ni Manulat nga gitug-an sa kapuyo nga hubog ang biktima sa dihang iya kining gibiyaan nianang pagkagabii kay naglikay siya madapatan kay pirme siyang kulatahon niini kon mahubog.

Matud niini didto  natulog sa panimalay sa iyang mga ginikanan ang babaye nga naa sa pikas barangay.

Nagtuo si Jelyn nga nahuwasan na sa kahubog ang  biktima mao nga nipauli siya apan nakurat na lang nga patay na   kini.

Si Manulat nagduda nga posibleng gisaka sa mga mamumuno ang biktima ug diha gibunal-bunalan hangtud nga napatay. Padayon pa ang kapolisan pagtino kon kinsa ang posibleng naghimo sa krimen. (/IBM)(BANATNEWS)